Act 14 | ASO | STEP | Ne'mine ikevo Ikonio ebeku' heteli a'mine'mine igi Zuda veti mono' numungu' dizi mono' lasine'. Ne'mine lasingumu' evene' mulise naba Zuda vesi nGiliki aleve netesi gili ngeho lani'.

Acts 14

Pauloki Banabasiki Ikonio Ebeku' Vi Hetelasine' Gamazi

1 Ne'mine ikevo Ikonio ebeku' heteli a'mine'mine igi Zuda veti mono' numungu' dizi mono' lasine'. Ne'mine lasingumu' evene' mulise naba Zuda vesi nGiliki aleve netesi gili ngeho lani'. 2 Ne'mine ani'za Zuda ve linge ma ve setalitisi gamazi gili hulave nete a'minguti' ve linge maliti mulu'ningu' hizi guvelesi ve'mi evenele zuhomu' gili goloso ilizave li ga'ine dani'. 3 Ne'mine ikevo nemu' nene Paulokisi Banabasikisi gamene ha'na a'mida ha mini ngehelele izamivo Guvelesi ve'mo nasahili' o-ledo do lu' izaa' neine' gamazi nene livi kiselivi' igi li-ngimi' ngimi' igi minasine'. Ne'mine igi nizasivo Guvelesi ve'mo mangi o-ledo do lu' izaa' neine' evene' gilavo gihile izeleseive lo Guvelesi ve'mo a'mine lasine' gamazi hize ele' ogo amuzo ngemavo ingine oso' amoso' nite' ato' ato' di soto' asine'. 4 Ne'mine ikesivo a'mine ebe' nabalo' minani' aleve ingine ho'li lingela Zuda vetida gi'mizekevo lingela nene aposolo setata vi gi'mizani'. 5 Ne'mine ikevo alinge' nene misubo me'ningesi Zuda vesi ido' engi' gizebo vesi di nubo igi aposolo divi ledivi' igi geheni hulo hulo' ogo ngebelelone li li hukani'. 6 Li hukikevo Pauloki Banabasiki a'mine gamazi gili golise vi Likaionia ebe' nabau' Lisitila numuda ido' Delebe numuda ido' a'mida numuno ngomo ngomo mine'mo moningu' nesi vi 7 mono' gamazi lamine' nene li-ngimika' li-ngimika' igi moni minasine'.

Lisitila Ebeku' Paulo'ni Gehenidunu' Bilani' Gamazi

8 Ido' Lisitila numuda ve ma gizene hela hela gebili do minine'. Ido' aza nene izeleho gana' gidinguti' gizene goloso o vine' gedavo aka monamo hu'mo hu'mo ogo minaa' ine' 9 Neivo Paulo' mono' nolivo nogilivo Paulo' aza gisili hizo vonu' belo ningine' nene a'mine ve ne'mo O'mosomu' gele ele'vole' ogo neivo lamine' ozo lokuvo lamine' ilive lo ningo giline'. 10 Ne'mine lo gelo gamazi naba lo ti' lo lo-imine': Gaza ote pehe lo minezo. Ti' lo lavo upuho' ogo oto aka mone mone ine'.

11 Ne'mine ogavo evene' muki' nete Paulo' ine' inite' ne ningi engi' Likaionia aleveti gamazi'ninguti' gamazi naba li ti' li lani': O'mosolitise evene' oko'ine di otuhi lelita limi nizasive li lani'. 12 Banabasi'nimu' engi' o'moso nite' mali'mi gulive li Zeuse' ve li mili-dani'. Ido' Paulo' aza gamazi gamazi laa' ive mininako leli' O'moso nite' Heleme' oga' ine' ne'mine azasi neive li gulive a'mido' Heleme' ve li mili-dani'. 13 Ne'mine ikevo ebe' naba ne'mi velela Zeuse'nimu' ve li mono' numuno gizikani' ma minine'. A'minguti' Zeuse'ni mabanuho gizo emaa' ive aza gonolise inite' lolo' ogo bulumaka' izeliti luvo'ningu' molo-ngedo ebe' nabali'mi gatedo' do do vo azasi evene' mukikisi mabanuho gize ngemelone li nilavo 14 aposolo seta' Pauloki Banabasiki ingine gili upuho' goloso igi inite' lolo' ilizani' nene goloso nite' ve li evene' ningi gililisave li genegana'ine di boloti loti' izi vi evene' mulise nizangu' heteli geke' li 15 ti' li lasine': Vekizo, lingine nanitekumu' ne'mine ilisa nave. Laza nene lingine gidini haza evene' nosive. Lingine nene o'mosotine soza sazali'mine haza nite' nene mehedine ngimi mine'mo dizovo' minaa' neine' O'moso ezela vi gi'mizilizave lo mene gamazi lamine' nene nolo-lingimusive. Aza a'mine O'moso nene Okulumo' misubo ido' guvo noso ido' muki' inite' neine' nene do soto' molani' ve. 16 Gamene gala'mudati' evene' linge muki' ingine ani' amani' i'mi nidizavo gele ngemavo engi' lu'ine'mo lido' aka ato ato' di soto' mili'mi dizani'. 17 Lamine' nenako aza nene eze monovo ngelebizamo haza minine' nevoba eze monovo ningilizave lo do lamine' o-lengedo Okulumokuti' nene goline gamenesi noso' nite' vai' laa' ine' gamenesi lingimivo nivi' nivi' igi mini muludingu' lamine' gilaa' nave. 18 Ne'mine lasine'za nesi nene evene' nete mabanuho gizi ngimilisa ha amuzo mili gili minikevo ge'nebe goloso igi o'ove li-ngidikesivo gili ngimi mabanuho gizi ngimamani' ve.

19 Ne'mine ani'za Zuda ve ma Adiokia ebekutikisi ido' Ikonio ebekutikisi igi evene' muki' go'ine izikevo Paulo'ni geheni huli huli' igi bilikevo helavo mo hilihe li numunguti' gelelehe' igi di heta limi si'mingala huli-dani'. 20 Huli-dani'za Izesu' evenele zuholite igi hize vodo vodo i-dikevo oto vo numuno nabau' dizine'. Dizo ongo go' lavo Banabasikisi Delebe numuno ebeku' vasine'.

21 Vi a'mine ebeku' minani' aleve mono' gamazi lamine' nene li-ngimikesivo evene' muki' gili di Izesu' evenele zuho lili' ani'. Ne'mine ikevo asine' akala tine' mili vi Lisitila ebeta vi Ikonio ebeta vi Adiokia ebeta vi hetelasine'. 22 Nivi Izesu' evenele zuho a'mine ebeku' mini'mi vani' nene monoku' amuzo mili minilizave li ga'ine di'mi di'mi moni igi lu'ine di amuzo mili-ngidi ti' li li-ngimasine': Mulumo nite' muki' soto' o lemelido' o neine' nenako a'mine mulumo nite' gehelonidotikovo' nene O'moso'mo gizebo o neine' ebeku' mo'mosite dalosune li li-ngimasine'. 23 Ne'mine igi Izesu' evenele zuho mulise mili'mi monangu' numudo' numudo' evene' linge ma di kegesi gizebo ve'ine minilizave li ngele'mize mili'mi vi monokumu' gili noso' nite' malise igi O'mosola li Guvelesi vemu' gili ele'vole' ikeze nemu' aza gizebo o-lingidivo li lasine' ve.

Silia Misubouko Adiokia Ebeta Tine' Mili Vasine' Gamazi

24 Ne'mine igi Pisidia misubo huli vi Pamahilia misubouko hetelasine'. 25 Heteli Pelega ebeku' mono' li-ngimi Atalia ebeta limi vasine'. 26 Limi heteli sipiu' dizi a'mingu' Adiokia ebeta hetelasine'. Ado' a'mine di osu' lasine' mono' gono nene olihe api' igi dalisa nasivo Izesu' evenele nete O'mosola li a'mine gono nidasivo O'moso'mo nasahili' o-ngedo hize ele' o-ngedo minelive li a'mine gonou' ngimiselani' ebeta igi hetelasine'. 27 Ido' a'mido' igi heteli Izesu' evenele zuho di mulise mili-ngidi O'moso'mo hize ele' o-ngidivo gono dasine' gamazi li-ngimi ido' O'moso'mo akahe si'ze-ngedavo heta ato' ve ma Izesu'nimu' gili ele'vole' ani' nemu' vetete' igi li-ngimi osu' lasine'. 28 Ne'mine igi Izesu' evenele zuhosi mini gamene ha'na minasine' ve.